عهدي بها قدام تلبس عبايه
وانا بعد قبل ألبس شماغ وعقال
طفلين نتهجّى حروف الهجايه
الله ياماجمل سواليف الأطفال
كانت لنا في كل شارع حكايه
وكنا نقول علوم ماهيب تنقال
وكنت اتقاسم مامعاهـا معايـه
من عسكريم التوت للعلك ابوريال
وكانت بعكسي شاطره في القرايه
تقرأ جزء عـمّ وطـه والانفال
وأنا لك الله من مواري غبايه
مدري ابو النقطه هو الدال او ذال
وكانت لابويه تشتكي من شقايه
وتعلّمه كيف اربط الباب بحبال
ياما على ظهري كسر من عصايه
يقول لي / خلّك وأنا ابوك رجّال
وامي تقول / ادع لولدك الهدايه
خوفي يصيبه كثرة الضرب بهبال
لاشفتها مع اول الدرب جايه
مدري أنا اللي ملت ولاّ الوطا مال
احسّ قلبي يرتجف فـي حشايه
ماكنّه الاّ الضيف لاهزّ فنجال
ياما عن " السّعلي " تخبّت ورايه
لاخوفوها فيه ثم شافت ظلال
تقول / خلّك يا حمودي معايه
واسّتأنس العب عندها دور الابطال
وآغار حتّى من عيون اصدقايه
لا طالعوها قلت / ((تكفون ياعيال))
